കൈരളീ കിരണ്മയീ

മുകളിലുള്ള വീഡിയോ പ്രവർത്തിക്കുന്നില്ലെങ്കിൽ, നേരിട്ട് യൂട്യൂബ് വീഡിയോ കാണാൻ താഴെ അമർത്തുക: കൈരളീ കിരണ്മയീ

കൈരളീ കിരണ്മയീ
കേരകേദാരത്തിൻ കാദംബരീ
കേരളീയന്റെ കരളിലെയിരവിലായ്
കൈരവം വിരിയിക്കും സ്വർണ്ണാക്ഷരീ!

മാതൃവാണീ തവ മോഹനഭാഷ്യം
മുഴങ്ങട്ടെ കർണ്ണപടങ്ങളിലെന്നും
മലയാളമേ നിന്റെ കോമളഭാവം
മോദകമാവട്ടെ ഭാവിയിലെന്നും.

മരതകശോഭയിൽ ഹരിതാഭമാകും
ചാരുലതേ നിന്റെ ചരണപ്രകാശം,
പൂരപ്രഭയിലൊരായിരം വർണ്ണമായ്
കരിവീരരാജരാലാഘോഷിപ്പൂ!

കളരികൾ കൂത്തുകൾ കഥകളികൾ പിന്നെ
കളങ്ങളിൽ നിറയുന്ന പൂക്കളങ്ങൾ
കേരളനാടിന്റെ ആരാമഭംഗിയിൽ
കോരിത്തരിക്കുന്നു ലോകാന്തരംഗം!

 

2014 ൽ, വാഷിങ്ടൺ ഡിസിയിലെ മലയാളി സംഘടനയായ കേരള അസോസിയേഷൻ ഓഫ് ഗ്രേറ്റർ വാഷിംഗ്ടൺ (KAGW) ആവശ്യപ്പെട്ടിട്ടാണ് 'മലയാളമേ സ്വരരാഗമേ' എന്ന എന്റെ ആദ്യത്തെ മലയാളം / കേരളം വാഴ്ത്ത് പാട്ട് പിറക്കുന്നത്. അതിന് ശേഷം, 2020 ലെ കേരളപ്പിറവിക്കാണ് 'മലയാണ്മ' എന്ന രണ്ടാമത്തെ പാട്ട് പിറക്കുന്നത്. വാഷിങ്ടൺ ഡിസിയിലെ തന്നെ വേറൊരു പ്രമുഖ മലയാളി സംഘടനയായ കേരള കൾച്ചറൽ സൊസൈറ്റി ഓഫ് മെട്രോപൊളിറ്റൻ വാഷിംഗ്ടൺ (KCSMW) ന്റെ മലയാളം കളരി വിഭാഗത്തിലെ ഒരു അദ്ധ്യാപകൻ, അവരുടെ കളരിദിനാഘോഷത്തിന്റെ ഭാഗമായി ഒരു പാട്ടിന് പരതി നടക്കുമ്പോൾ, അദ്ദേഹം പരതി വശം കെടാതിരിക്കാൻ വേണ്ടി, ഒരു മണിക്കൂർ കൊണ്ട് എഴുതിക്കൊടുത്ത പാട്ടാണ് 'മലയാണ്മ'. അദ്ദേഹത്തിന്റെ നിർദ്ദേശപ്രകാരം, മകൾ ദേവകി തന്നെ ആ പാട്ട് ആദ്യമായി പാടി. അതിന് ശേഷം എല്ലാ കേരളപ്പിറവിക്കും ഒരു പുതിയ പാട്ട് എഴുതി ദേവകിയെക്കൊണ്ട് പാടിക്കുന്നത് ഒരു ശീലം പോലെയായിത്തീർന്നു.  അങ്ങനെ 2021 ൽ എഴുതിയ പാട്ടാണ് 'പടച്ചോന്റെ ദേശം'. ആ ഒരു ശീലത്തിന്റെ ചുവട് പിടിച്ചാണ്, ഈ വർഷവും (2022) 'കൈരളീ കിരൺമയീ' എന്ന പുതിയപാട്ട് എഴുതാൻ നിയോഗമുണ്ടായത്. ഈ ശീലം എത്ര കാലം  തുടരാൻ കഴിയുമെന്ന് ഒരു നിശ്ചയവുമില്ല. എന്തായാലും അടുത്ത വർഷത്തേക്ക് പാട്ട് ഇപ്പഴേ തയ്യാറാണ്! ഈ 'കൈരളീ കിരൺമയീ' എന്ന പാട്ട് എല്ലാവർക്കും ഇഷ്ടപ്പെടുമെന്ന് കരുതുന്നു. അഭിപ്രായങ്ങൾ അറിയിക്കുക.

 

മേൽ പ്രതിപാദിച്ചിട്ടുള്ള പാട്ടുകളുടെ നേരിട്ടുള്ള യൂട്യൂബ് വീഡിയോ കാണാൻ, തെഴെയുള്ള ലിങ്കുകളിൽ അമർത്തുക:

മലയാളമേ സ്വരരാഗമേ

മലയാണ്മ

പടച്ചോന്റെ ദേശം

***

അമ്പതമ്പമ്പമ്പോ!

അമ്പത് തുളുമ്പുമീ നമ്പറിൽ 
‘ഹമ്പട വമ്പാ’ എന്നോതുന്നു നൻപന്മാർ!
 
കമ്പും പിടിച്ച് തമ്പിലാവാതിരിപ്പാൻ 
കമ്പിളിക്കുള്ളിലായ് കൂമ്പാതിരിപ്പാൻ 
തൂമ്പാ പിടിച്ചും തുമ്പി പിടിച്ചും 
പമ്പരം കറക്കിയും മാമ്പഴം തിന്നും 
ഞരമ്പിലെ‌ നൊമ്പരം അറിയാതിരിക്കാൻ 
വെമ്പുന്ന പിൻപനായി ചിന്തിച്ചിരിപ്പു ഞാൻ !

***

അമ്പതാം പിറന്നാളിന്, എന്തോ ഭയങ്കര സംഭവം പോലെ കുറെയധികം അനുമോദന പ്രവാഹങ്ങൾ ഉണ്ടായിരുന്നു. ആ കൂട്ടത്തിൽ താഴെ കാണുന്ന തരത്തിലൊരു അനുമോദനവും വന്നു:

"അമ്പത് വെറുമൊരു നമ്പറാണെന്നറിയുന്ന

അമ്പത് പടി ചവിട്ടിയ അമ്പതുകാരനായ
നമ്പാവുന്ന സുഹൃത്തിന് അമ്പതിനായിരം
അമ്പതാം പിറന്നാൾ ആശംസകൾ"

മേല്പറഞ്ഞതിന് മറുപടിയായി, നിമിഷങ്ങൾ കൊണ്ട് തോന്നിയ കുറിപ്പാണ് ഈയൊരു കുഞ്ഞ് കവിത പോലൊരു സംഭവം 'മ്പ' കൊണ്ട് ഉണ്ടായിട്ടുള്ളത്!

അതിന് പിന്നെയും മറുപടി വന്നു:

Prasad Nair:

മുമ്പരാകാൻ വെമ്പുന്നവരുടെ  ലോകത്തിൽ 
പിമ്പനായിരുന്നു തുമ്പിയെ പിടിക്കുന്ന അമ്പതുകാരാ, 
മുമ്പിലേക്ക് വന്ന് അമ്പതിലും മുമ്പൻ താനെന്ന് 
ഇമ്പമോടെ ചൊല്ലുകിൽ പിമ്പർക്ക് മുമ്പിൽ വരാൻ പ്രേരണയായിടും !

ഈ മ്പ കവിത ഫേസ്‌ബുക്കിലിട്ടപ്പോൾ, പിന്നെയും കിട്ടി, കുറേ മ്പ കമന്റുകൾ:

Vinayachandran:
നമ്പരുത് നമ്മളീ നമ്പറുകൾ
വെമ്പണം വമ്പനാം യാത്രകൾക്കായ്
വെറും നമ്പറുകൾ മാത്രമീ പ്രായമെല്ലാം

Jobin Kuruvila:
ആനയും അമ്പാരിയുമെവിടെ? നൊമ്പരം മാറ്റിടും കരിമ്പിൻ ജ്യൂസെവിടെ?
ജന്മദിനാശംസകൾ വേണു ഭായ് പിമ്പനല്ല, മുമ്പനാണ്!

AlexJacob :
"വമ്പനെന്തിനു കൊമ്പെടാ,
ഇടനെഞ്ചിലിത്തിരി കാമ്പുണ്ടേൽ!
കണ്ടു കണ്ടു കിടുങ്ങി നില്ക്കും,
കൊമ്പനാനയിതമ്പമ്പോ!"
അമ്പതിൻ്റെ ആശംസകൾ! ഇനിയുമൊരമ്പതു കൂടി സമൃദ്ധിയോടെ തുളുമ്പട്ടെ!

Chadayan Mohanan:
അമ്പമ്പോ....... അർദ്ധ സെഞ്ച്വറി........ വമ്പാ.... നീ ഒരു കൊമ്പനാ...... അമ്പതിൽ വമ്പൻ നീ താൻ

***

നാട്യാഞ്ജലി

നേരിട്ട് യൂട്യൂബിൽ കാണാൻ ഇവിടെ അമർത്തുക 

ഓം ശിവം നീലകണ്ഠപ്രശോഭിതം
വിഘ്നേശ്വര പ്രസന്ന നടനകലാക്ഷേത്രം
നടരാജവിലാസവിരാജിതചലനസൗഷ്ഠവം
നാട്യഗൃഹേ സ്വരജതിയാർജ്ജിതലയരാഗതാളം.

പദചലനമേവം മഞ്ജീരമുഖരിതം
മുഖഭാവജ്വലിതം മോഹിനീനവരസപ്രസരിതം
അംഗുലീഹസ്തരചിതം മുദ്രാഭരിതപൂരിതം
അംഗോപാംഗം നയനമനോഹരവേഷഭൂഷിതം.

സർവ്വകലാവല്ലഭേ സരസ്വതീം നമസ്തേ
താണ്ഡവനടനൌർജ്ജപുഷ്കരൗ നമസ്തേ
വന്ദേഹം ഭരതമുനീലിഖിത നാട്യശാസ്ത്രേ
സ്മരാമി സംപൂജിതഗുരുപാദപങ്കജം.

नाट्यांजलि
रचना: वेणुगोपालन कोक्कोटन  ( नारायम् ) 

ॐ शिवम् नीलकंठप्रशोभितम्

विघ्नेश्वार प्रसन्न् नटनकलाक्षेत्रम्

नटराजविलासविराजित चलनसौष्ठवम्

नाट्यगृहे स्वरजतियार्ज्जित लयरागतालम्

पदचलनमेवम् मंजीरमुखरितम्

मुखभावज्वलितम् मोहिनीनवरसप्रसरितम्

अंगुलीहस्तरचितम् मुद्राभरितपूरितम्

अंगोपांगम नयनमनोहर वेषभूषितम्

सर्व्वकलावल्लभे सरस्वतीम् नमस्ते

तांडवनटनौर्ज्ज पुष्करौ नमस्ते

वन्देहं भरतमुनीलिखित नाट्यशास्त्रे

स्मरामि सम्पूजित गुरुपादपंकजम्

ആംഗലേയ വർഷം 2014 മെയ്‌ 11 ഞായറാഴ്ച്ച, ബൂവിയിൽ (അന്ന് ഞങ്ങൾ താമസിച്ചിരുന്ന മേരീലാന്റിലെ സ്ഥലം) ഞങ്ങളുടെ സുഹൃത്തായ മോഹൻജിയുടെയും ഷിജിയുടെയും വീട്ടിൽ ഞങ്ങൾ ചില സുഹൃത്തുക്കൾ ഒത്തുകൂടി. ഞാൻ കെ എ ജി ഡബ്ല്യൂവിന്റെ ആശയഗാനം എഴുതിയിട്ട് ഏകദേശം ഒരു വർഷമാകുന്ന സമയം. മഞ്ജുളാ ദാസ് അവരുടെ 'പുഷ്കര നാട്യാലയം' തുടങ്ങിയിട്ട് കുറച്ച് മാസങ്ങളേ അന്ന് ആയിട്ടുള്ളൂ. അവരുടെ വിദ്യാലയത്തിലെ ഏറ്റവും ആദ്യത്തെ വിദ്യാർത്ഥികളായിരുന്നു എന്റെ രണ്ട് പെൺമക്കളും ഭാര്യയും. അന്നത്തെ സംസാരത്തിനിടയിൽ മഞ്ജുവും അവരുടെ നല്ല പാതി രാജേഷ് നെടുങ്ങാടിയും അവരുടെ നൃത്താലയത്തിന് ഒരു ആശയഗാനം എഴുതാൻ പറ്റുമോ എന്ന് ചോദിച്ചു. നോക്കാം എന്ന് പറഞ്ഞ് അന്ന് രാത്രി ഞങ്ങളെല്ലാവരും പിരിഞ്ഞെങ്കിലും, മനസ്സിൽ ഒരു പാട്ടിന്റെ ബീജാവാപം നടന്നുകഴിഞ്ഞ അന്ന് രാത്രിയിലെ ഉറക്കം, ബോധത്തിലും ഉപബോധത്തിലും ചിന്തകൾക്ക് വഴിമാറിക്കൊടുത്തു - എങ്ങനെ ഒരു നൃത്തവിദ്യാലയത്തേയും അതിന്റെ ചുറ്റുപാടിനേയും കുറച്ച് വരികൾക്കുള്ളിൽ തളച്ചിടാം എന്ന ചിന്ത; അതോടൊപ്പം എങ്ങനെ ആ പാട്ടിന്റെ പദസങ്കലനം, ഭാരതീയരായ എല്ലാ ഭാഷക്കാർക്കും മനസ്സിലാക്കാൻ പാകത്തിലാക്കിയെടുക്കാം എന്ന ചിന്ത; ആ ഗാനത്തിന്റെ ഘടന, നൃത്തച്ചുവടുകളുടെ അകമ്പടിയോടെ അവതരിപ്പിക്കാൻ പറ്റുന്ന രീതിയിൽ എങ്ങനെ വാർത്തെടുക്കാം എന്ന ചിന്ത !

പിറ്റേന്ന് എന്റെ ആപ്പീസിലേക്കുള്ള യാത്രക്കിടയിൽ പാട്ടിന്റെ ഒരു ഏകദേശ രൂപം രൂപപ്പെട്ടതിൽ, കുറച്ചു വരികൾ പല്ലവിയായി എന്റെ മൊബൈൽ ഫോണിൽ കുറിച്ചെടുത്തു (അന്നത്തെ എന്റെ ആപ്പീസ് യാത്രക്ക് അങ്ങോട്ടും ഇങ്ങോട്ടും ഏകദേശം നാലര മണിക്കൂർ സമയം എടുക്കുമായിരുന്നു - തീവണ്ടിയിലും ബസ്സിലും നടത്തവുമൊക്കെയായി ). വൈകുന്നേരം വീട്ടിലേക്കുള്ള തിരിച്ചുള്ള യാത്രയിൽ അനുപല്ലവിയും ചരണവും രൂപപ്പെടുത്തി ആദ്യത്തെ കരട് തയ്യാറാക്കി. അത് അന്ന് തന്നെ മഞ്ജുവിന് അയച്ചുകൊടുക്കുകയും അതവർക്ക് ഇഷ്ടപ്പെട്ടെന്ന് അറിയിക്കുകയും ചെയ്തു. വീണ്ടും മൂന്ന് ദിവസങ്ങൾ കഴിഞ്ഞ്, അതായത് 2014 മെയ്‌ 15 വ്യാഴാഴ്ച്ച, വീണ്ടും ചില തിരുത്തലുകൾ വരുത്തി അയച്ച രണ്ടാമത്തെ കരട് രൂപമാണ് ഈ പാട്ടിന്റെ അവസാന വരികളായി പരിണമിച്ചത്.

മഞ്ജുളാ ദാസിന്റെ ഭാരതനാട്യഗുരുപുത്രൻ ശ്രീകുമാറാണ് (RLV Sreekumar Thampalakkadu) ഈ ഗാനം ഈണമിട്ട് ആലപിച്ചിരിക്കുന്നത്. അദ്ദേഹത്തിനും ഈ പാട്ടിന് വാദ്യവൃന്ദം ഒരുക്കിയവർക്കും എന്റെ ഹൃദയംഗമമായ നന്ദി അറിയിച്ചുകൊള്ളുന്നു. എല്ലാവർക്കും ഈ ചെറിയ ഗാനോപഹാരം ഇഷ്ടപ്പെടുമെന്ന വിശ്വാസത്തോടെ നിങ്ങൾക്കായി സമർപ്പിക്കുന്നു.

****

ഈയൊരു പാട്ട് 2014 മെയ് മാസത്തിൽ എഴുതിയതാണെങ്കിലും, 2022 ഏപ്രിൽ വരെയും പാട്ട് വെളിച്ചം കണ്ടിരുന്നില്ല. മഞ്ജുളാ ദാസുമായും  ശ്രീകുമാറുമായും പിന്നീട് നടന്ന ചില ചർച്ചകൾക്ക് ശേഷം, കുറച്ച് നീളം കുറച്ചും, കൂടുതലായി ചില മെച്ചപ്പെടുത്തലുകൾ നടത്തിയും, ഒരു ചടുലമായ ഭാരതനാട്യനൃത്തത്തിന് അനുസൃതമായി കുറച്ച് സ്വരജതികളും മറ്റും ചേർത്ത്, പാട്ട് re-tune ചെയ്യാൻ പദ്ധതിയിട്ടിരുന്നെങ്കിലും പലകാരണങ്ങളാലും വിചാരിച്ചതുപോലൊന്നും കാര്യങ്ങൾ നടന്നില്ല. നമ്മുടെ പരിമിതികൾക്കുള്ളിൽ, അത്തരം നന്നാക്കലുകൾ, ഇനി എപ്പോൾ നടക്കുമെന്നും അറിയില്ല

അങ്ങനെ ചിന്തിച്ചപ്പോഴാണ്, ഭാവിയിൽ കൂടുതൽ നന്നാക്കിയെടുക്കാൻ സാധിച്ചേക്കുമെന്ന വിശ്വാസം കൈവിടാതെ തന്നെ (അതിന് വേണ്ടി സംഗീതം നന്നായറിയുന്ന ആരെങ്കിലും സ്വമേധയാ സന്നദ്ധമായി അവതരിക്കുമെന്ന് പ്രതീക്ഷിക്കുന്നു), ഈയൊരു പാട്ട് എന്നെന്നേക്കുമായി ഇരുളിന്റെ മറവിലായിരിക്കുന്നതിനേക്കാൾ നല്ലത്, മഞ്ജുളയുടെ അനുമതിയോട് കൂടി, അത് ആദ്യമായി ചിട്ടപ്പെടുത്തി പാടിയിട്ടുള്ള രൂപത്തിൽ തന്നെ ജനസമക്ഷം സമർപ്പിക്കാൻ ആലോചിച്ചത്. ഒരു നൃത്തപാഠ്യശാല എങ്ങനെയാരിരിക്കണം എന്ന എന്റെ ചിന്തകളാണ് വാക്കുകളായി ഈ പാട്ടിൽ ഉൾപ്പെടുത്താൻ ശ്രമിച്ചിട്ടുള്ളത്. ആവും വിധം എല്ലാ പദങ്ങളും, ഭാരതത്തിലെ എല്ലാവിധ ഭാഷക്കാർക്കും മനസ്സിലാകുന്ന രീതിയിൽ തിരഞ്ഞെടുക്കാൻ ശ്രമിക്കുകയും ചെയ്തിട്ടുണ്ട്.

ഗൂഗിളിൽ നിന്ന് വെറുതെ കിട്ടുന്ന ചില ഭരതനാട്യ ചിത്രങ്ങളൊക്കെ ചേർത്ത്, പാട്ട് ഒരു വീഡിയോ രൂപത്തിലാക്കാൻ മക്കളായ പാറുവിനെയും ദേവുവിനെയുമായിരുന്നു ഏല്പിച്ചിരുന്നത്. "എന്തിനാണ് വെറുതെ മറ്റുള്ളവരുടെ ചിത്രങ്ങളെടുക്കുന്നത്... പകരം, നമ്മൾ തന്നെ, നമ്മൾ നൃത്തം ചെയ്യുന്ന വീഡിയോ എടുത്ത് ചേർക്കുന്നതല്ലേ നല്ലത്..." എന്ന് അവർ പറഞ്ഞപ്പോൾ, ഞാൻ തടയാനൊന്നും പോയില്ല 😊 ഈ വീഡിയോയിൽ നിങ്ങൾ കാണുന്ന എല്ലാ ചലനങ്ങളും, മക്കളുടെയും നല്ലപാതിയുടെയും ഈ വർഷത്തെ (2022) വസന്തകാല അവധിസമയത്തെ (spring break) സർഗ്ഗാത്മകത (creativity) യാണ്. വെറും രണ്ട് ദിവസങ്ങൾ കൊണ്ടാണ്, അവർ മൂന്നുപേരും കൂടി ചുവടുകൾ ചിട്ടപ്പെടുത്തുകയും അവരുടേതായ സ്വാതന്ത്ര്യത്തിൽ വീഡിയോ ചിത്രീകരിക്കുകയും ചെയ്തിരിക്കുന്നത്. വീഡിയോയുടെ ചിത്രീകരണ ഗുണനിലവാരത്തിലുള്ള അപാകതകൾ  കാര്യമാക്കുന്നില്ല.  കാരണം, വളരെ ഇഷ്ടപ്പെടും താല്പര്യപ്പെട്ടുമാണ് അവരെല്ലാവരും ഇതിനുവേണ്ടി പ്രവർത്തിച്ചിട്ടുള്ളത്. പാട്ടിന്റെ വീഡിയോ കണ്ടും കേട്ടും അഭിപ്രായം അറിയിക്കുമല്ലോ. ഇഷ്ടപ്പെട്ടെങ്കിൽ ഷെയർ ചെയ്യുമെന്ന പ്രതീക്ഷയോടെ...

***