ഗാന്ധിജിയും ഗോഡ്സെയും പ്രഗ്യയിലൂടെ

(Picture Source: Google)

Published in Naaraayam Facebook page on 30th Jan 2020

ഇന്ന് ജനുവരി 30. ഈ വർഷവും ഞാൻ കാത്തിരിക്കുകയായിരുന്നു... കഴിഞ്ഞവർഷത്തെപ്പോലെ, നമ്മുടെ ഭാരതമഹാരാജ്യത്തിന്റെ MP മാരിൽ രാജ്യസ്നേഹം അത്യധികം തുളുമ്പി നിൽക്കുന്ന സാമാജികയായ പ്രഗ്യാസിങ് താക്കൂർ, ഈ വർഷത്തിലെ ജനുവരി 30 നും, ചോരജലം നിറച്ച മഹാത്മാഗാന്ധിയുടെ ചിത്രത്തിൽ നിറയൊഴിച്ച്, ഭാരത്മാതക്കും 'മഹാത്മാ' നാഥൂറാം ഗോഡ്സേക്കും ആയിരമായിരം ജയ് വിളിച്ച്, അതിന്റെ വീഡിയോയുമെടുത്ത് നിർവൃതി കൊള്ളുമോയെന്ന് ഇത്തിരി ആശങ്കയോടെ പ്രതീക്ഷിച്ചിരിക്കുകയായിരുന്നു... പക്ഷെ അങ്ങനെ സംഭവിച്ചതായി വാർത്തയൊന്നും കണ്ടില്ല.. ചിലപ്പോൾ താക്കൂർജി, ഗാന്ധിജിയോട് മനസ്സാ മാപ്പും പറഞ്ഞ്, ആരും കാണാതെ കക്കൂസിൽ കയറി കണ്ണാടി നോക്കി വെടിവച്ചുകാണും, സ്വന്തം കാൻസറിനൊപ്പം രാജ്യത്തിന്റെ കാൻസറും മാറ്റാൻ !

സവർക്കറിന്റെ പ്രതിമ പാർലമെന്റിൽ വച്ചതവിടെയിരിക്കട്ടെ. പ്രതിമയല്ലേ, ചിരിക്കുകയോ ചിന്തിക്കുകയോ ചിലക്കുകയോ ചെയ്യില്ലല്ലോ. അപ്പോൾ കുഴപ്പമില്ല. അതിന്റെ സന്ദേശങ്ങളെന്തായിരുന്നാലും കാണുന്നവർ അവരവരുടെ ചരിത്രജ്ഞാനത്തിനനുസരിച്ച് അതിനെ വിവക്ഷിക്കട്ടെ. പക്ഷേ, നാക്കെടുത്താൽ വിരലിലെണ്ണാവുന്നവർക്ക് മാത്രം രോമാഞ്ചമുണ്ടാക്കി കാളകൂടം വമിപ്പിക്കുന്ന, കാവിപ്പിത്തം ബാധിച്ച, ജീവനുള്ള പ്രഗ്യാസിങ് താക്കൂർജിയെ സാങ്കേതികത്വത്തിന്റെ ന്യായം പറഞ്ഞ് പാർലമെന്റിൽ ഇരിക്കാനനുവദിക്കുന്ന, ശ്വാസോച്ഛ്വാസങ്ങളിൽ ദേശസ്നേഹം മാത്രം തുളുമ്പുന്ന, മഹാത്മാഗാന്ധിയെയും ഗോഡ്സെയെയും വിപരീതദിശകളിൽ മനസ്സിലാക്കുന്ന പാർട്ടിക്കാരെ തീർച്ചയായും തിരിഞ്ഞു നിന്ന് തന്നെ നമിക്കണം, കൂടെ താക്കൂർജിയെ തിരഞ്ഞെടുത്ത ജനങ്ങളെയും!

***