(Picture Courtesy: Google / Internet)
അങ്ങനെ Citizenship (Amendment) Bill (CAB) ഉം National Register of Citizens (NRC) ഉം നമ്മൾ പാസ്സാക്കി. അല്ല പിന്നെ, മറ്റുള്ള എല്ലാ രാജ്യത്തും ഇതുപോലുള്ള നിയമങ്ങളൊക്കെ നിലവിലുണ്ട്. ആരൊക്കെ വരണം, ആരൊക്കെ പോകണം, ആരൊക്കെ നിലനിൽക്കണം എന്നൊക്കെ നിശ്ചയിക്കുന്നത് നമ്മളാണ്. ഭൂമിയൊക്കെ അളന്ന് അതിരുകളുണ്ടാക്കി, ഇത് നമ്മന്റെ, അത് നിമ്മന്റെ എന്നൊക്കെ പറഞ്ഞ് മസില് പെരുപ്പിച്ച് നടക്കുന്ന എല്ലാ രാജ്യങ്ങൾക്കും അങ്ങനെയുള്ള നിയമങ്ങളുണ്ട്. ഈ നിയമങ്ങളൊക്കെ ഉണ്ടായിട്ടും, പക്ഷികളും കാറ്റും മരത്തിന്റെ വേരുകളുമൊക്കെ എന്തിനാണ് ഇങ്ങനെ അതിർവരമ്പുകൾ കടന്ന് പോകുന്നത് എന്ന് എനിക്കൊട്ടും ഇതുവരെ മനസ്സിലായിട്ടില്ല. ഹാ.. അതൊക്കെ പോകട്ടെ, കാര്യത്തിലേക്ക് വരാം... പൗരത്വ നിയമം... എന്തുകൊണ്ട് അതുപോലൊന്ന് നമ്മുടെ ഭാരതമഹാരാജ്യത്തിന് ആയിക്കൂടാ? പശ്ചിമപൂർവ്വ രാജ്യങ്ങളിലുള്ള ജനക്ഷേമത്തിന് വേണ്ടിയുള്ള എല്ലാ നല്ല നിയമങ്ങളും നമ്മൾ കണ്ട് മനസ്സിലാക്കി നമ്മുടെ രാജ്യത്തും ജനക്ഷേമതാല്പര്യങ്ങൾക്കായി ചില നിയമങ്ങൾ ഉണ്ടാക്കുന്നതിന് എന്തിനാണിത്ര കലിപ്പ്? പാശ്ചാത്യ രാജ്യങ്ങളിലെ റോഡുകളും മനുഷ്യരുടെ ജീവിത നിലവാരവും ഒക്കെ കണ്ട് മനസ്സിലാക്കി നമ്മുടെ നാട്ടിൽ അവതരിപ്പിച്ചതുകൊണ്ട് ഭാരതമഹാരാജ്യത്തെ ഒരു മാവേലിപുരമാക്കി മാറ്റിയത് നിങ്ങളാരും അറിഞ്ഞില്ലെന്നുണ്ടോ? ഈ നിയമങ്ങൾ, അതും ന്യൂനപക്ഷങ്ങൾ എന്ന ഒരു പക്ഷത്തിന്റെ, അടിച്ചമർത്തപ്പെട്ടവരുടെ നന്മക്ക് വേണ്ടിയാകുമ്പോൾ, എന്തിനാണീ ആവലാതികളും പൊല്ലാപ്പുകളും? അങ്ങനെ പുതിയ പുതിയ നിയമങ്ങളുണ്ടാക്കി ജനങ്ങളുടെ നിലവാരം കൂടിക്കൂടി മതജാതിവർണ്ണലിംഗഭേദമെന്യേ ഏറ്റവും കൂടുതൽ സന്തോഷവാന്മാരെയും സമാധാനമനസ്കരായും ജീവിക്കുന്ന സ്കാന്ഡിനേവിയൻ രാജ്യങ്ങൾ പോലും നമ്മളെക്കണ്ട് അത്ഭുതത്തോടെ മൂക്കത്ത് വിരൽ വെക്കുന്ന അവസ്ഥയല്ലേ വരാൻ പോകുന്നത്?
കോൺഗ്രസ്സുകാരും കമ്മ്യൂണിസ്റ്റുകളും ന്യൂനപക്ഷപ്രീണനം നടത്തുന്നെന്ന പച്ചയായ സത്യം വിളിച്ച് പറഞ്ഞാണ് ഇന്നത്തെ അധികാരിവർഗ്ഗം അധികാരത്തിലെത്തിയത്. ഒരഞ്ച് വർഷങ്ങൾക്ക് ശേഷം അവർക്കും ന്യൂനപക്ഷപ്രേമം തുടങ്ങിയിരിക്കുന്നു എന്നതിൽ കോൺഗ്രസ്സ്കാരും ദള്ളുകാരും കമ്മ്യൂണിസ്റ്റ്കാരും അഭിമാനിക്കുകയല്ലേ വേണ്ടത്? ന്യൂനപക്ഷങ്ങൾക്ക് സ്വന്തം രാജ്യത്തിലെ ന്യൂനപക്ഷം, അയൽരാജയങ്ങളിലെ ന്യൂനപക്ഷം എന്ന വേർതിരിവുണ്ടോ? അങ്ങനെ പക്ഷം പിടിച്ച് കാണേണ്ടതുണ്ടോ? ഭാരതത്തിൽ പുല്ലിനേക്കാൾ ഇത്തിരികൂടുതൽ വിലയുള്ള ഒരേയൊരു സാധനമാണ് മനുഷ്യജീവനുകൾ. നമ്മുടെ ജനസംഖ്യ ലോകത്തിലേക്കും വച്ച് ബല്യതാവാൻ ഒരു പത്ത് കൊല്ലം കൂടി നമ്മൾ കാക്കേണ്ടതുണ്ടോ? ബംഗ്ളാദേശിൽ നിന്ന് ന്യൂനപക്ഷങ്ങളായ ഇരുപത് ലക്ഷം, പാക്കിസ്ഥാനിൽ നിന്ന് കുറച്ച് ലക്ഷങ്ങൾ, അഫ്‌ഘാനിസ്ഥാനിൽ നിന്ന്... അങ്ങനെയങ്ങനെ... നമ്മൾ ഭൂമിയിൽ വച്ച് ഏറ്റവും മഹത്തുക്കളായ, അവിടങ്ങളിലെ ന്യൂനപക്ഷങ്ങളായ ഹിന്ദുക്കളെ (ഫാലൂദയ്ക്ക് മുകളിലെ അലങ്കാരങ്ങളെപ്പോലെ കൂടെ സഹോദരങ്ങളായ ബുദ്ധരും ജൈനരും സിക്കുകാരും കൂട്ടത്തിൽ ഇത്തിരി പാഴ്സികളും പിന്നെ ക്രിസ്ത്യാനികളും) ഭാരതത്തിലെത്തിച്ച് ജനസംഖ്യയിൽ ഒരഞ്ച് കൊല്ലം കൊണ്ട് തന്നെ ചൈനയെ ചവിട്ടിത്താഴ്ത്തി ഗിന്നസ്സ് പുസ്തകത്തിൽ കയറുന്നതിൽ ആർക്കാണ് പരാതി? അങ്ങനെ ഹിന്ദുക്കൾ കൂടുമ്പോൾ ഇവിടെ ചില വോട്ടുബാങ്കുകൾ ഉണ്ടാക്കിക്കളയും എന്ന് പറയുന്നത് എന്തൊരു വിഡ്ഢിത്തമാണ്?
അതിലാരാണ് മനസ്സ് വച്ച് മതം കലർത്തുന്നത്? ന്യൂനപക്ഷം എന്ന് പറയുമ്പോൾ, അത് കൃത്യമായും ന്യൂനപക്ഷമായിരിക്കണം. അങ്ങനെ നോക്കുമ്പോൾ പാക്കിസ്ഥാനിലും ബംഗ്ളാദേശിലും അഫ്‌ഘാഗാനിസ്ഥാനിലും ഹിന്ദുക്കൾ ന്യൂനപക്ഷങ്ങളല്ലേ? മുസ്ലീമികൾ ഒഴിച്ചുള്ളവരുടെ ജനസംഖ്യ അവിടങ്ങളിൽ കൂപ്പ് കുത്തിയില്ലേ? അവരെ രണ്ടാംകിട പൗരന്മാരായി തരം താഴ്ത്തിയില്ലേ? അവരെ കൊന്നും ബലാൽസംഗം ചെയ്തും മതം മാറ്റിയും അവിടത്തെ ഭൂരിപക്ഷമുസ്ലിമുകൾ പീഡിപ്പിച്ചില്ലേ ? എന്നിട്ടും മുസ്ലീമുകളെ നമ്മുടെ ബില്ലുകളുടെ പരിധിയിൽ നിന്ന് ഒഴിവാക്കിയതിന് നാട്ടുകാരെന്തിന് ബഹളം കൂട്ടുന്നു? ഛെ.. ഛെ ...
മാനുഷിക സ്നേഹം മൂത്ത് ചെയ്യുന്ന കാര്യത്തിനെ അഭനന്ദിക്കുകയല്ലേ വേണ്ടത്? പിന്നെ അഹമ്മദീയാക്കളുടെയും റോഹിങ്ക്യകളുടെയും കാര്യം. അഹമദീയാക്കളെ മുസ്ലീമുകളായി നമ്മുടെ കാന്തപുരം പോലും അംഗീകരിക്കുന്നില്ല.. അവര് അർദ്ധരാത്രിയിൽ വെറും ഇടിക്ക് പൊട്ടിമുളച്ച കൂണുകളാണ്.. നമ്മൾ ചിലപ്പോ അടർത്തിയെടുക്കും, കറി വെക്കും... അവർക്ക് പാക്കിസ്ഥാനിലോ ഭാരതത്തിന്റെ മണ്ണിലോ ജീവിക്കാനർഹതയുണ്ടോ? ഒരിക്കലുമില്ല... അവർ നരകിക്കാൻ വേണ്ടി മാത്രം ജനിച്ചവരാണ്.
പിന്നെ വൃത്തികെട്ട ജന്മങ്ങളായ റോഹിങ്ക്യകൾ ! ബർമ്മയുമായി നമുക്ക് അതിർത്തിയുണ്ടെങ്കിലും ബർമയിലെ ന്യൂനപക്ഷങ്ങളായ റോഹിങ്ക്യകളെ ബർമ്മക്കാർ ന്യൂനപക്ഷങ്ങളായി അംഗീകരിക്കാത്തിടത്തോളം നമുക്ക് അവരെ ന്യൂനപക്ഷങ്ങളായി അംഗീകരിക്കാൻ പറ്റുമോ? മാത്രവുമല്ല അവർ ഭാരതത്തിലേക്ക് അഭയാർത്ഥികളായി വരുന്നത് ബംഗ്ളാദേശിലൂടെയുമാണത്രെ ! വരുന്നുണ്ടെങ്കിൽ നേരിട്ട് വരണം... വളഞ്ഞ് വരരുത്. പിന്നെ ഈ റോഹിങ്ക്യകൾ ബർമ്മക്കാരാണോ അതോ ബംഗ്ളാദേശുകാരാണോ എന്നെങ്ങനെ നമുക്ക് പറയാൻ പറ്റും? അതൊക്കെ പോകട്ടും... ആയിരത്തി എണ്ണൂറുകളിൽ, ഇന്ന് മനുഷ്യാവകാശങ്ങൾ പ്രഭാതം മുതൽ പ്രദോഷം വരെ ബാങ്ക് വിളിക്കുന്ന ബ്രിട്ടീഷുകാർ പോലും ഈ റോഹിങ്ക്യകളെ, അവർ ബംഗാൾ ഒറിജിനലുകളാണ് എന്നും പറഞ്ഞ് ബർമയിലെ കാനേഷുമാരിയിൽനിന്ന് പോലും ഒഴിവാക്കിയതാണ്. അങ്ങനെയാവുമ്പോ ബർമ്മക്കാർക്കോ ബംഗ്ളാദേശുകാർക്കോ ഭാരതീയർക്കോ ഇന്നത്തെ മ്യാൻമറിലെ അരാഖൻ പ്രവിശ്യയിൽ ജീവിച്ച് പോരുന്ന റോഹിങ്ക്യകളെ എങ്ങനെ അംഗീകരിക്കാൻ പറ്റും? ഒരു പക്ഷം പോലും ഇല്ലാത്തവരെ നമുക്കെങ്ങനെ ന്യൂനപക്ഷമാക്കാൻ പറ്റും ? അതുകൊണ്ട് സമാധാനക്കാരായ മ്യാൻമർ ബുദ്ധന്മാർക്കും അവിടത്തെ ജുണ്ടകൾക്കും വെട്ടിക്കൊന്നും തീകത്തിച്ചും ബലാൽസംഗം ചെയ്തും കൂട്ടത്തോടെ കൊന്ന് വാരിക്കുഴിയിൽ തള്ളപ്പെടാൻ മാത്രമല്ലാതെ റോഹിങ്ക്യകൾക്ക് എന്തെങ്കിലും അവകാശം ഈ മണ്ണിലുണ്ടോ? (പ്രതികാരത്തിന് റോഹിങ്ക്യകളും ചില ബോംബ് പ്രയോഗങ്ങൾ നടത്തുന്നുണ്ട്) അതുകൊണ്ട് ഒരിക്കലും CAB യിലും NRC യിലും നമുക്ക് അഹമ്മദിയാക്കളെയും റോഹിങ്ക്യകളെയും ചേർക്കാൻ പറ്റില്ല. ബംഗ്ളാദേശുകാര് പോലും റോഹിങ്ക്യകളുടെ ബംഗ്ളാ 'ഒറിജിൻ' അംഗീകരിക്കുന്നില്ല! പുണ്യഭൂമിയുടെ വക്താക്കളായ സൗദിക്ക് പോലും അവരെ വേണ്ട! എന്നിട്ടാണ്...
പിന്നെ നമ്മുടെ പാവം ശ്രീലങ്കൻ തമിഴർ! മണ്ടന്മാരേ, നമ്മൾ പറഞ്ഞുവരുന്നത് കരബന്ധമുള്ള അയൽരാജ്യങ്ങളിലെ ന്യൂനപക്ഷങ്ങളെപ്പറ്റിയാണ്. ശ്രീലങ്കക്കും ഭാരതത്തിനുമിടയിൽ കടലുണ്ട്.. കടൽ... നേപ്പാൾ ന്യൂനപക്ഷങ്ങളെക്കുറിച്ച് എന്തുകൊണ്ടാരും പറയുന്നില്ല എന്നതിനെക്കുറിച്ച് എനിക്ക് ആവലാതിയില്ല. കാരണം ഞാനെന്തിന് ആവലാതിപ്പെടണം? ഭൂട്ടാൻ പിന്നെ വെറും കുട്ടിയാണ്... ആരുടേയും അല്ലലില്ലാതെ സമാധാനമായി ജീവിക്കുന്ന ഒരുകൂട്ടം ഇടയന്മാർ. പിന്നെ നമ്മുടെ ചൈന. നമ്മളിപ്പോൾ തുടങ്ങുക മാത്രം ചെയ്തിരിക്കുന്ന പണി ചൈനക്കാർ പണ്ടേ തുടങ്ങിക്കഴിഞ്ഞു. ഷിൻജിയാങ്ങിലെ ഉയിഗുർ അണ്ണന്മാർ കൂട്ടമായി ഇപ്പഴേ ചില ചേമ്പറുകളിലാണെന്നാണ് കേൾവി ! ചൈനയോടാണ് കളി !
ജീവിക്കാൻ അർഹതയുള്ള കൂട്ടങ്ങൾ മാത്രമേ ഈ മണ്ണിൽ ജീവിക്കാൻ പാടുള്ളൂ. വളരെ കഷ്ടപ്പെട്ട് അയൽരാജ്യങ്ങളിലെ ന്യൂനപക്ഷങ്ങളെ അംഗീകരിക്കാമെന്ന് തീരുമാനിച്ച ഈ സമയത്ത് റോഹിങ്ക്യകൾക്കും അഹമ്മദീയാക്കൾക്കും ന്യൂനപക്ഷത്തിലെ ഭൂരിപക്ഷഹിന്ദുക്കളുടെ കൂട്ടത്തിൽ പൗരത്വം കൊടുക്കണമെന്ന് പറയുന്നതിൽ എന്തർത്ഥമാണുള്ളത്? അരാഖനിലെ നാനൂറോളം ഗ്രാമങ്ങളിൽ ജീവിച്ചിരുന്ന റോഹിങ്ക്യകൾ ഇപ്പോൾ വെറും ഇരുനൂറ്റമ്പതോളം ഗ്രാമങ്ങളിൽ മാത്രമേയുള്ളൂ. ബാക്കി വരുന്നവരും സ്വർഗ്ഗം പൂകാൻ വേണ്ടി മറ്റുള്ളവരാൽ പീഡിപ്പിക്കപ്പെട്ട്, രക്ഷപ്പെടാനെന്നുള്ള വ്യാജേന ഊര് തെണ്ടി, പെട്ടന്ന് തന്നെ ഇല്ലാതായിക്കോളും. പിന്നെ നമ്മളെന്തിന് അവരുടെ കാര്യത്തിൽ ഇടപെടണം?
പിന്നെ ആസാമികൾ പറയുന്നത്; ആസാമികൾ പറയുന്നു, മുസ്ലീമുകളെ മാത്രമല്ല മറ്റുള്ളവരെയും പുറത്താക്കണം എന്ന്. ആ പറഞ്ഞതിലല്ലേ നേരത്തേ പറഞ്ഞതിനേക്കാൾ കൂടുതൽ യുക്തി എന്ന് ചോദിക്കരുത്. പിന്നെ നമ്മുടെ വോട്ടിന്റെ കാര്യം ആര് നോക്കും? അതുകൊണ്ട് ആസാമികൾ പറയുന്നത് ഒരിക്കലും അംഗീകരിക്കാൻ കഴിയില്ല.
അടയാളങ്ങൾ പേറാതെ ജീവിക്കാൻ ആർക്കെങ്കിലുമുണ്ടോ അർഹത ? അടയാളങ്ങളുണ്ടായാലും അടയാളങ്ങളുള്ളവർക്കു പോലും അവരുടേത് പോലുള്ള ആ അടയാളങ്ങൾ കാണാൻ കഴിയുന്നുണ്ടോ? അടയാളങ്ങളില്ലാതെ ജീവിക്കാൻ പറ്റില്ലെന്ന് മനസ്സിലാക്കി, സാഹചര്യത്തിനനുസരിച്ച് ചില അടയാളങ്ങൾ അണിഞ്ഞിട്ടും വേറൊരു സാഹചര്യത്തിൽ മറ്റൊരു അടയാളം പേറിയവർ, ഞങ്ങളെപ്പോലെയല്ല നിങ്ങളെന്ന് പറയുന്നതിൽ എന്താണിത്ര തെറ്റ്? അല്ലെങ്കിൽ വരൂ.. യുദ്ധം ചെയ്യൂ... ജയിക്കുന്നവന്റെ അടയാളമാണ് ശരിയെന്ന് പറയൂ.. ഹല്ല പിന്നെ !
എല്ലാ മതങ്ങളും മനുഷ്യവാസത്തിന് പറ്റിയ ഒരു സ്ഥലമായി ഭൂമിയെ മാത്രമേ കാണുന്നുള്ളൂ. സ്വർഗ്ഗം പോലും മനുഷ്യവാസത്തിന് പറ്റിയതല്ല, കാരണം, സ്വർഗ്ഗം പൂകാനും മരിക്കണം. എന്നാലാ മരണം ആരെങ്കിലും ഒരിത്തിരി നേരത്തേയാക്കാൻ ശ്രമിക്കുന്നുണ്ടോ? ഏയ്.. ചോദ്യങ്ങളരുത്... അപ്പൊ ശരി... ഭൂമിയെങ്കിൽ ഭൂമി... ഭൂമിയിലെ ഏറ്റവും നല്ല സ്ഥലം? അത് എന്റെ രാജ്യം... ഏറ്റവും നല്ല മതം? അത് എന്റെ മതം. ഏറ്റവും നല്ല ജീവി? അത് മനുഷ്യൻ. മനുഷ്യരിൽ ആണോ പെണ്ണോ നല്ലത്? അത് ആണ്. ഏതാണ് നല്ല നിറം? അത് വെളുപ്പ്... ഏറ്റവും നല്ല രാജാവ്? എന്റെ രാജാവ്. എന്റെ രാജാവിന്റെ തീരുമാനം അതെന്റെ ഗുദമുഖദ്വാരത്തിൽ കോലിട്ടിളക്കുന്നതായാലും അതാണ് ശരിയായ തീരുമാനം. അതിൽ ഒരൊറ്റ പക്ഷമേയുള്ളൂ രാജാവിന്റെ പക്ഷം. പണത്തിന്റെയും അധികാരത്തിന്റെയും ചൂഷണത്തിന്റെയും പക്ഷം. അതിൽ പക്ഷപാതമോ പക്ഷഭേദമോ ഇല്ല. മേല്പറഞ്ഞ ഉത്തരങ്ങളിൽ നിന്ന് മാറി നിങ്ങൾക്ക് മറ്റു വല്ല ഉത്തരങ്ങളുമുണ്ടെങ്കിൽ, മാനുഷികമായും താത്വികമായും ചിന്തിക്കുന്നുണ്ടെങ്കിൽ, അവർക്ക് മാത്രമുണ്ടാകുന്ന ഒന്നാണ് പക്ഷാഘാതം!
വാലറ്റം: സ്വന്തം അസ്ഥിത്വം തെളിയിക്കാൻ അപ്പനപ്പൂപ്പന്മാരുടെ അസ്ഥികൂടങ്ങൾ തേടി നടക്കേണ്ട കാലം വരുമെന്നതിനെപ്പറ്റി നമുക്കൊക്കെ കിനാവ് കാണാവുന്നതാണ്. ഹിറ്റ്ലർ ജൂതന്മാർക്കും ജൂതന്മാരുടെ വീടുകൾക്കും അടയാളങ്ങൾ അണിയിച്ചതും തുടർന്ന് അവരെ ഗെറ്റോകളിലേക്ക് പറഞ്ഞയച്ചതും ഒടുവിൽ കൂട്ടത്തോടെ വാതകക്കൂടാരത്തിലിട്ട് കാലപുരിക്കയച്ചതും വെറുതെ നമുക്ക് അയവിറക്കാം. വാതകം അടിച്ച് കേറുമ്പോൾ ഒരു സുഖമാണ്, മരണസുഖം!
