മുസ്‌ലിം സ്ത്രീകളുടെ പള്ളിപ്രവേശം

(Picture Source: Google)
Published in Naaraayam Facebook Page on 29th Jan 2020

വിശ്വാസിയാണോ അല്ലയോ എന്നുള്ളതോ തെളിവുകളില്ലാത്തത് കൊണ്ടും ഒരുതരത്തിലും മനസ്സിലാക്കാൻ, ബോധമനസ്സിന് യാതൊരുതരത്തിലുമുള്ള ഉപാധികളില്ലാത്തതുകൊണ്ടുമാണ് ‘ചില കാര്യങ്ങൾ’ ‘വിശ്വസി’ക്കേണ്ടിവരുന്നതെന്നതുകൊണ്ട്, ‘വിശ്വാസം’ തന്നെ ഒരുതരം അന്ധവിശ്വാസമല്ലേ എന്നുള്ളതോ ഒന്നുമല്ല ഇന്നത്തെ നമ്മുടെ വിഷയം 😊

ഒരു ബല്യ മാറ്റത്തിന് കൂടി നമ്മുടെ ‘മഹാ’ഭാരതത്തിൽ തുടക്കമായിരിക്കുന്നു. സ്ത്രീകളെയും മുസ്‌ലീം പള്ളികളിൽ പ്രാർത്ഥിക്കാൻ അനുവദിക്കണമെന്നുള്ള പൂനെ സ്വദേശികളുടെ അപേക്ഷയിൽ, സ്ത്രീകൾക്ക് പള്ളികളിൽ കയറാനും പ്രാർത്ഥിക്കാനും ഒരു തടസ്സവുമില്ലെന്നും ഞങ്ങളതിന് അനുകൂലമാണെന്നും പറഞ്ഞുകൊണ്ട് മുസ്‌ലീം വ്യക്തിനിയമ ബോർഡ് സുപ്രീം കോടതിയിൽ സത്യവാങ്മൂലം കൊടുത്തിരിക്കുന്നു. മുഴുവനായും പുരോഗമിച്ചില്ലെങ്കിലും പുരോഗമനത്തിലേക്കുള്ള പുരോഗമനപരമായ മാറ്റം!!

സ്ത്രീകൾ ദൃഷ്ടിയിൽ വന്നാൽ കലിയുഗവരദന്റെ ബ്രഹ്മചര്യം നഷ്ടപ്പെടുമ്പോലെ, ആരുടെയൊക്കെ പള്ളികളിൽ (പള്ളികൾ ദേവാലയമല്ല, മറിച്ച് പ്രാർത്ഥനാലയമാണെന്നൊക്കെ പറഞ്ഞ് എന്നെ മലർത്തിയടിച്ചേക്കാം 🤔) ഏതൊക്കെ ദൈവത്തിന്റെ (മുസ്ലീമികൾക്ക് ഒരു ദൈവമേയുള്ളൂവെന്ന് പണ്ഡിതന്മാർ പറഞ്ഞുവച്ചിട്ടുള്ളത് മറക്കുന്നില്ല. പക്ഷേ, ഒരു ദൈവമേയുള്ളൂവെങ്കിലും ഒരേ ഒരു ദൈവവും ഒരേയൊരു പുസ്തകവും വച്ച് നൂറായിരം വകതിരിവുകൾ ദൈവം തന്നെയുണ്ടാക്കിയിട്ടുണ്ടല്ലോ 😄)ബ്രഹ്മചര്യമാണ് ഇനി നഷ്ടപ്പെടാൻ പോകുന്നതെന്ന് ദൈവത്തിന് പോലും നിശ്ചയമില്ലാത്ത അവസ്ഥയിൽ, ചുരുങ്ങിയത്, ആരുടെയോ ‘കത്തിച്ചാൽ കത്താത്ത’ നീളൻ മുടിയുമെടുത്ത്, ശുദ്ധജലം ദിവ്യജലമാക്കി വിതരണം ചെയ്ത്, നാല്പത് കോടിയുടെ പള്ളിയുണ്ടാക്കി നാട്ടുകാരെ അനുഗ്രഹീതരാക്കാൻ നടക്കുന്ന, സ്ത്രീകൾ മുഷ്ടി ചുരുട്ടുന്നതിൽ കുണ്ഠിതമുള്ള നമ്മുടെ കാന്തപുരത്തിനെങ്കിലും നിശ്ചയമുണ്ടാവുമെന്ന് നമുക്ക് ‘വിശ്വസി’ക്കാം 😀!!

***